鐘錶美女胡敏珊前晚在中環舉行生日派對，穿上性感透視corset、迷你裙的壽星女，輪住任陳偉霆、謝婷婷咀，她飲酒醉到面紅，high到反眼伸脷嘩鬼叫，更直呼要閃電結婚。
胡敏珊前晚在中環ifc搞生日派對，對於歲數絕口不提的她，卻無意漏口風指剛好今年新舊曆同一日，經估計，相信她是38歲生日。
亢奮尖叫
性感打扮亮相的胡敏珊，其妹妹、妹夫、弟弟、男友龐維仁，以及一班好友謝婷婷和陳偉霆等都為她慶祝生日，她興奮非常，通場飛，見到陳偉霆即攬頭攬頸，之後又孖住謝婷婷狂隊香檳，high到舉手反眼。壽星女合十切蛋糕後，亢奮得伸脷尖叫，陳偉霆和雲何婉薇等更輪住咀她，謝婷婷更和她嘴對嘴kiss，反而男友龐維仁一點表示也沒有，只站在後排。
錫啖就夠
胡敏珊說：「又大一歲，年年18歲！」生日願望？她說：「希望可以幫到唔同嘅人啦，今日叫咗啲朋友捐錢畀兒童癌病基金，大家嚟到每人錫我一啖就夠，媽咪死咗，我幾年都冇搞生日，我今日同媽咪張相講：媽咪，我家好開心。」她更大想頭謂希望助養100萬名小孩。
問到何時結婚生仔？胡敏珊笑着說：「唔知，冇人求婚，唔知今日會唔會閃電結婚啦。」
此外，名模陳嘉容（Eunis）與前夫RickyKwok同場，問Eunis可有跟前夫打招呼，她說：「距離得太遠，冇喎。」她未等到切蛋糕就匆匆離開。
採訪：LawWaiMan
攝影：MatthewLam
