香港首富李嘉誠上月底81歲生日，李超人近日再做爺爺，可惜乖孫長治太細個唔適合搭長途機，梁洛施母子取消返港同佢慶祝，生日當日超人只係喺屋企食飯，而超人紅顏知己周凱旋噚日現身中環名店掃貨，睇完男裝又去揀眼鏡，唔知係咪送禮畀超人呢？
身為首富紅顏，周凱旋自己身家都十分豐厚，噚日出巡購物十分架勢，由三名外籍保鑣前後護航，包抄左右翼滴水不入，同行仲有一名女士。一行人先到中環歷山大廈嘅Prada，兩位女士行入舖，幾個保鑣則守住門口，閒雜人等免進，俾周凱旋包場慢慢揀。
歷山Prada款式多而且齊，天王郭富城置裝都係嚟呢處掃貨，但都未威到可以包場揀衫，現場所見，周凱旋企喺男裝部指手畫腳，好似做指揮官咁指令sales拎啲衫褲畀佢睇，一班店員就騰嚟騰去忙到氣咳，狂風掃落葉式血拼一輪，大約20分鐘左右，店員已經為佢執咗幾大袋戰利品，交畀門外保鑣拎走。
只用10分鐘買眼鏡
離開Prada，周凱旋同女伴購物慾似乎意猶未盡，再由保鑣護送去中建大廈嘅溥儀眼鏡店，例牌動作係女主角行先，保鑣就做門神。呢間眼鏡店出名多設計師眼鏡賣，頗多名人幫襯，周凱旋入到去即刻有專人招呼佢揀眼鏡，周凱旋係做慣大買賣嘅女強人，挑選眼鏡原來一樣咁果斷，佢火速試戴一副黑框眼鏡後，似乎都幾滿意，前後唔使10分鐘就埋單畀錢，非常爽快。
買完眼鏡，周凱旋離開溥儀時有記者問佢有冇見過長治，佢笑住反問：「問啲intelligent（聰明）少少嘅問題好冇？」外間盛傳李澤楷向來同超人嘅紅顏知己冇兩句，講到呢啲家事，周凱旋有此反應值得理解。再問佢有冇同長治食過飯及係咪買眼鏡畀李嘉誠，佢封口不作回應，仲快步上車絕塵而去。佢部座駕唔係普通貨色，原來係寶馬760LIAHighSecurity防彈房車，價值600幾萬，據講超人大新抱王儷橋出入都係坐呢款車。
mailto:[email protected]
