何謂平成「拉打」？即係由幪面超人古迦開始，到龍騎、555、響鬼、電王，再到仍喺日本熱播嘅最新作《Decade》等10套作品。呢隻粉紅色「巴曲」頭Decade，絕招就係碌卡變身成歷代「拉打」，屈機之餘乘機大條道理一隻Game齊晒人隻揪隻；弊！阿媽！我部PS2呢？「阿仔，唔使驚，你部第一水PS3兼容PS2Gameo架嘛！」係噃！
文：阿洛
變身！必殺技齊回味
醒呀！仲出喺PS2，擺明Fans向，你總有部PS2看門口啩？3D格鬥，今次收錄超過40種「拉打」迷最愛嘅變身場面同必殺技特寫，淨係儲齊晒都有排玩。玩法都係互毆，儲滿畫面下方分成四格嘅能量，受傷或儲氣都可以令呢條能量增加，唔同超人、唔同招式會消耗唔同格數能量，好似電王用一格就可以轉換形態，而Kabuto就要用晒成條先出到ClockUp。
故事Mode逐個郁
《Decade》你未必有追開，講番個古仔先，主角叫「門矢士」，本來係正常人，不過因為不同「拉打」平行世界互相靠近，令佢身處個世界隨時被毀滅而得到變身能力，任務就係去不同平行世界「消滅」其他前代「拉打」。
簡化模式你識我都識
每次得到新卡，都可以碌卡使出不同必殺技，不過放心，會有出招表之餘，仲可以選擇簡易模式，順序輸入指令就可以使出連技加必殺技，就算係唔識打機嘅「拉打」迷，都可以舒舒服服睇靚人靚景。
南光太郎現身！
播映緊嘅《Decade》，第26、27話竟然出現《幪面超人Black》同《幪面超人BlackRx》男主角真身，嘩，年華老去仲要打怪獸，真係英雄嘅悲哀。仲有就快喺日本上映嘅《Decade》劇場版，更會集合平成、昭和年間26位「拉打」，超重卡士，超期待呀喂！
Profile
遊戲：幪面超人ClimaxHeroes
製作廠商：NAMCOBANDAIGames
機種：PS2
類型：動作
人數：1至2人
