今日係時候講下好耐冇講過嘅白銀。作為白銀戰隊隊長，應該同各位戰隊隊員update下白銀嘅情況。
由我喺06年3月6日第一次叫大家「一注獨贏買白銀」後，白銀升咗四成。如果你話：「咁嘅回報超水皮！」咁水皮嗰個係你，因為由第一次買白銀後，我都建議用平均入市法去買。白銀擁有「三線股商品」嘅特性，係一路橫行到最後先呈現暴升走勢。你想越買越貴，定係低價集齊貨先等爆升？
趁低入貨等爆升
原材料大升勢冇變過，有如87年股災係股票大牛市其中一個入市大良機，舊年白銀跌到落8美元一盎斯時都係一樣。三年半前提供有十年有效期嘅120美元一盎斯目標價，剩番六年半當然standbymycall。
但大家買白銀一定要小心，一定要買實貨。因為實在太多冇貨嘅人，長年拋空或以紙幣做交收。當白銀最後爆升時，到做終極擔保嘅花旗國政府都風聲鶴唳，國債價跌，全球棄美元，聯儲局就要好似80年代初咁，將美元息口推升至15厘以上。實貨白銀同紙上白銀價會有越來越大嘅差價。到息口升到咁高，銀價又到我嘅目標價時，就係轉買美股之時。
今日係最尾一篇《金手指》，如果呢幾年來你有睇過孫柏文嘅文，我想多謝你嘅支持。呢三年半喺壹傳媒做嘢，眼界大開，最重要係識到班好好嘅同事。我家趁機睇下之後有咩搞，不過一定同你哋呢班fan屎後會有期。最後講多次，一注獨贏買白銀！
孫柏文
http://phatdat.blogspot.com