國家統計局一改慣例，以後每個月11日公佈全部經濟數據。缸邊人謂有「啞仔食黃蓮」之感，因為未來得及分析，市場已郁，最後搞到傳媒掛住報經濟情況，忽略個別板塊內的「寶藏」。
上月內地煤炭產量為2.7億噸，較去年同期升14.8%，同期發電量亦增4.8%。唔只係用電量升令電煤需求增多，山西省亦率先調升8月焦炭指導價格至每噸1880元（人民幣．下同），加幅近一成，原因係鋼材價急升。
不過即使煤價漲，並唔係間間煤企都受惠，中小型煤礦正面臨「國進民退」地步。由於中央要解決產能過剩問題，打算到明年底將山西省2598座煤礦，整合至得番1000座。整合後，山西只會剩番生產規模不低於300萬噸嘅煤企，吞併中小煤礦當然成為大型煤企嗰杯茶。
點解咁誇？因為睇番山西省頭5個月產量，按年跌近12%，效率奇低，拖累全省GDP半年錄得4.4%負增長，係全國唯一上半年交唔到功課嘅省分。俾內蒙爬晒頭，成為全國產煤量之首，點可以唔急？
趁併購潮執筍嘢
要捕捉呢個「大吃小」嘅行業生態奇觀，首選肯定係中國神華（1088）。佢係行業龍頭大家一定知，仲要係上中下游「瓣瓣掂」，又經營埋運輸、鐵路同港口，目前控有內蒙、廣東等地7間電廠股權。雖然第一季營業收益增長放緩，但電煤均價仍有15%增長，算係唔錯。相信隨着山西大力整頓中小煤礦，神華隨時有機會執到「筍嘢」。
基本因素當然靚，但要配合短線炒作，除咗消息，貨源都好緊要。目前神華母公司持股73%，加埋美林等基金，街貨得番5%，難怪每次要舞高H股指數，神華梗係座上客。神華雖大隻兼穩陣，但走勢就唔及福山能源（639）。福仔股價沿住10日線上，不停破頂。呢隻入行只得幾年嘅生力軍，係「變身股」成功例子，絕對有機會攞「最有前途新人獎」。
以產量計，福仔係國內第二大硬煉焦煤生產商，原煤年產能達630萬噸。同神華廣泛嘅業務唔同，福山專注做開採同煉焦煤，而焦煤係煉鋼嘅重要原材料。君不見大小鋼企一盤散沙，鐵礦石談判越傾越差，基金無耐性索性換馬。反正福山有大客唐山、武漢、太原鋼鐵等「射住」，預測市盈率亦比鋼股平咁多，鍾情鋼股投資者不妨多多留意。
胡孟青