香港向來被謔稱為文化沙漠，近期又有文化界人士爭取喺恍如沙漠嘅西九文化區，設立「文學館」。一班文化人噚日聚首城大召開武林大會，其中曾捲入家暴疑案嘅前中大教授黃維樑發言話，家香港經濟比以前好，叫特首曾蔭權發財立品，設立文學館，用以肯定本土文學地位，咁先可以洗去文化沙漠惡名。唔只文化界想起文學館，台下一名退休建築師話，如果政府肯起，佢會重出江湖，幫手提供技術協助咁話。
約五年前，國學大師饒宗頤同作家劉以鬯率先倡議喺西九建文學館，呢輪新運動係由董啟章等發起，不過政府暫時未見有積極回應，有人仲質疑香港有文學咩？噚日出席嘅文化人仲有黃坤堯，冇現身嘅也斯亦用書面發言。