港交所（388）上市委員會前主席、現任畢馬威（KPMG）會計師行中國及亞太區主席嘅唐家成（Carlson），原來同汽車好有淵源。佢接受會計師公會月刊《APlus》訪問時話，老竇Carlos早年喺香港做汽車sales，代理英國利蘭同保時捷汽車，所以特登用「C」字頭幫兒孫改英文名，Carlson細佬叫做Carl，細妹叫Carol，而Carl兩個細路就叫Clinton同埋Constance。
之不過，唐家成個仔出世時，佢老婆阿Gill決定為C字輩煞停，改名做Owen，佢哋收養嘅3歲孤兒就叫Michael，而收養過程咁啱都同汽車有關。話說當年阿Gill經常到黃大仙孤兒院帶Michael仔出外玩，一向都搭地鐵同小巴，直至有次禮拜日揸車兜風，點知返到院舍，Michael忽然若有所失喊到拆天，聞者落淚，阿Gill終於心軟，呢位小朋友就係咁成為家庭一分子。
自爆成功之道靠誠實
唐家成又自爆成功之道在於誠實，佢74年喺英國讀完會計文憑，入咗當地一間細行，專接唐人街餐廳嘅核數生意，雖然提供一條龍服務，但處事就揸正嚟做，要求華人老闆必須交稅，要玩花臣唔該另請高明。79年跳槽至KPMG後，就升到家呢個位。