近日深交所高調嚴查新股上市的違規炒作同內幕交易，發現單係桂林三金，上市首日入市的散戶，超過八成都損手，加埋唔見咗2700萬元（人民幣．下同）。深交所即時出招洗太平地，立案調查40幾個異常賬戶，雷厲風行，似要為即將出台的創業板鋪路。
中國創業板籌備咗十年，接受申請只係兩個星期，就有兩百間公司排隊等上市，投資者當然唔會放過，短短兩個星期新開嘅創業板賬戶已有18萬，證券行仲估計，有七成客有興趣開戶。新浪網訪問咗6萬幾人，六成幾人都話會參與。
點解咁熱？內地創業板要求高過香港唔少，公司至少要過去兩年都賺錢，而且資產唔少於2000萬元，我哋就只要求公司有正現金流同1億港元市值。內地當局一再強調，深圳創業板同全世界有別，係穩陣而有投資價值，正如NBA選秀，分分鐘有明日之星爆出。就係呢個心態，散戶憧憬如蘇寧電器般，由中小板一登龍門，「升」價十倍嘅故事會重演，話唔定會有「中國微軟」出現。股仔有憧憬就有得炒，炒創業板單日升跌可達20%，較主板嘅10%寬鬆，正所謂「炒得過癮，賺得輕鬆」，點會唔引死班炒友。
天使投資者水漲船高
要率先炒創業板，市場即時留意一眾創新科技投資公司，因為佢哋可以話係即將上創業板公司嘅「天使投資者」，就以最大嘅創投基金深圳創新投資集團為例，已投資超過50間公司，目前重點參股公司係大眾公用，旗下做燒垃圾嘅豐泉環保就係成功例子，佢哋前年以德國註冊嘅母公司中德環保到主板掛牌，係當地第一間上市嘅中國企業。
創業板消息一出後，股價被炒上嘅點止係佢，仲有一隻叫紫光股份，皆因佢持有清華紫光創投公司16%股權，另外仲揸住燕京、凌鋼、路橋建築等優質上市公司股權，近期無論「子憑母貴」定「母憑子貴」都好，股價通通升，總之係皆大歡喜。最後講多隻同樣升到一支箭咁嘅錢江水利，佢持有浙江天堂硅谷創業36%股權，呢間創投管理資產20億元，已投資公司超過16間。
創業板炒風似乎只係序幕，好戲在於呢批創投旗下公司上市，股價爆升，變相令持有佢哋嘅公司估值亦有所提高，創業板40倍市盈率係咪好貴？只係見仁見智。
胡孟青