颱風莫拉克重創台灣，撞正呢期帶黨團訪台嘅白鴿黨阿涂，噚日自爆好在喺機場早出發，到咗台北要長時間匿喺酒店，但總算安全無事，仲有幸同即將喺台灣教書嘅學運領袖王丹嚟次世紀飯局，得悉王丹會喺政大台灣史研究所教政治同歷史，歷史部份仲會主要教台灣史，此行都算不幸中之大幸，仲有意外收穫。
開心見港人堅持六四
白鴿黨呢個台灣訪問團，由於主要係想畀班黨內「乳鴿」黨員去當地開眼界，所以呢場世紀飯局，唔少後生仔亦有幸參加。據阿涂憶述，王丹見到一班香港後生仔好開心，話自己89年搞學運時，年紀同佢哋差唔多，又指王丹最開心嘅，要算係今年香港六四燭光集會多咗好多年輕人出席，反映香港嘅新一代，都對六四仲有份堅持。
準備喺台灣教書嘅王丹，其實近期對台灣南部受颱風重創十分關注，噚日就喺facebook，話連日睇見台灣電視新聞報道，都覺得心酸，決定要捐款支持同胞，即時喺網上請教網民，邊個台灣受款機構可靠，反映佢對台灣同胞亦十分關心。