傳媒攞到獨家猛料梗會搶先報道，但出咗獨家錯料就爆，近期出事例子係北京官方喉舌新華社。新華社繼早前老點內地群眾，指北京鳥巢、水立方免費開放三日後，前日又指新疆發生「劫機」。一波未平，前日再有傳媒中招，呢次「新浪」推「舊浪」，老點指數勁過新華社。話說新浪網前日轉載賭王入院嘅報道時，竟然以「何鴻燊逝世」作為「專題」名稱，結果即時引來網上熱爆討論。
專題錯咗一晚先更正
八方噚日上Google諗住搵賭王資料，點知輸入「何鴻燊」三個字後，即彈出「何鴻燊逝世」呢五隻字，仲要顯示有成37,129個搜索結果，對賭王嚟講，真係要講句大吉利是。
賭王家族生意龐大，就算身上少條毛，唔少股民都緊張到彈起，股民網上睇到新浪網呢個專題，已即時討論係咪要放股票，但好在大部份港、澳網民都眉精眼企，睇完呢個專題報道後，即時知道新浪網係「獨家誤報」，話俾個題搞到嚇一跳，又話最恐怖嘅，係呢個錯專題放喺網上整整一夜，到噚日朝早仲未更正。
唔少澳門網民一睇到呢段報道，即時喺網上留言話唔會信，指賭王喺澳門咁架勢，若然佢健康有乜唔妥，電視新聞點會唔報道，紛紛留言猛批新浪網今次專題係「文不對題」、「內容冇一個字係同死有關」、「邊有寫佢死」等等，鬧新浪網同早排不滿被新華社老點內地同胞有得揮。
有搞鬼網民就話，如果賭王真係，點解新浪網專題裏面，會指賭王二房何超鳳同其他家人，去完醫院之後都神情輕鬆？俾網民恥笑得犀利嘅，莫過於專題內容指賭王可以食粥水，質問新浪網：「死咗仲食粥水又點解釋？」
好在新浪網出錯一晚之後最終醒水，將原來呢個「獨家」題目，更正番做「何鴻燊入院」，唔少網站亦即時斬腳趾避沙蟲，將討論區相關討論全部移除，一於扮時運高乜都睇唔到。
雖然賭王尤其喺政治議題嘅言論，八方都唔覺啱聽，但就好認同佢為人大方，見到咁嘅錯料，照計只係例牌大笑一輪就算數。
mailto:[email protected]