TOM集團（2383）噚日派成績表，金融海嘯之下都仲賺千零萬，拆開幾瓣業務睇，樣樣都幾ok，相信楊國猛呢個TOM仔第四代CEO（首席執行官），應該都飲得杯落。
之不過，猛哥一向都有啲要求，絕對唔會容許任何一瓣業務鬆懈落嚟，瓣瓣業務都金睛火眼實，同埋落手落腳搞！
同陶傑輪流訪問名人
身為集團CEO嘅猛哥，學咗TVB總經理「志雲大師」去搞名人訪問，同陶傑輪流主持一個叫做「CEO實話實幹」嘅人物訪談節目，但猛哥冇學大師搞飯局，只係好傳統咁做訪問，不過，佢嘅嘉賓都係財經界名人。好似噚晚播第一集，嘉賓係百事可樂大中華區個型仔首席市場官許智偉，之後嘅嘉賓就有台灣文壇教父之一何飛鵬、NBA大中華區CEO陳永正等等。相信好多人想睇到嘅嘉賓，係TOM仔大股東之一超人李嘉誠，如果真係有佢現身講致富之道，擔保華娛收視即時升爆燈！