港台兩地關係本來平淡到唔平淡，到近幾個月突然升溫，台灣政界人物亦一個接一個嚟香港訪問。呢幾日嚟咗香港嘅台北縣縣長周錫瑋噚日返台灣前同傳媒茶敍，佢話以前港台兩地官員見面屬於大陣仗，今時唔同住日，大家有好多機會見面。講開今次訪問見過乜人，縣長話按照原來計劃，安排同前任、現任同準備參選嘅下屆特首見面，但因為打風冇個見得成。
八方隨即追問「下屆特首」究竟係邊個？佢本來以為答案喺香港已經通晒天，即刻由口爽變口密，「不好說，不好說！」究竟邊個會參加下屆香港特首選舉？講講吓瑋哥就透露，疑似參選下屆特首嘅梁振英CY，稍後會到訪台北同佢再見面喎。唔通係CY向人自爆，爭取兩岸政界支持佢做特首？