賭王何鴻燊入院至今兩個禮拜，無論係太太定仔女都話賭王嘅康復進度唔錯。噚日各房太太仔女照樣去醫院探賭王，四姨太梁安琪同超雲噚日凌晨先離開，到接近下晝4點四姨太又再現身，問佢賭王健康進展點樣，佢做出OK手勢話：「幾好幾好。」到6點50分左右，四姨太孖住超雲再到醫院。
獲贈打油詩
三姨太陳婉珍就一早8點幾探賭王，留到下晝3點先走，6點幾佢同助手再次出現，問佢何生今日情形點，佢話：「等我上去睇吓先。」超瓊、超鳳同超蕸三姊妹就噚日中午時分嚟到，留到3點幾就同車離開，到傍晚時候佢哋再出現，超蕸仲陪埋媽咪藍瓊纓一齊嚟；大房超賢同老公都有再嚟探賭王。
到夜晚約7點45分，超盈同細佬猷君一齊到醫院，但留咗15分鐘就走人，佢話：「上面好迫，冇位坐，遲啲先再嚟。」
喺晏晝時段，翁嘉穗都喺醫院出現過，佢見咁多記者仲八卦問乜嘢事，原來佢唔知賭王入院。上個禮拜嚟醫院送過首打油詩畀賭王嘅張伯伯，噚日又帶首新創作嚟，內容係：「賭王患病妻心痛，名醫施術可回春，善長有難天必擁，藥到病除康復中，四太慇懃親侍奉，愛夫情切愛情濃，賭王欣慰即讚頌，感謝四太送春風。」另外，何猷龍繼續搵人送足料飯盒畀記者，有鴛鴦炒飯、海鮮炆米同豆腐魚湯。
