睇報紙先知道有一間跨國銀行嘅私人銀行部門隔兩年就辦一個「富豪新一代理財訓練班」，英文係NXGEN，應該係NextGeneration嘅縮寫。私人銀行放長線，釣大魚，希望有錢人之下一代與銀行繼續維持關係，辦呢啲訓練班寓意甚深，係聰明一着。至於教啲咩嘢，我哋唔知詳細內容，但講到連結婚前簽訂「婚前協議書」（防止畀對方分一半身家之用）都教埋，咁就令一啲道德派搖頭咯，亞洲人係唔係咁西化，要學足荷里活影星或美國大富豪啲標準動作呀？不過又難怪嘅，有錢仔驚女方分身家，有錢女嫁人，亦驚男方分身家，簽訂婚前協議書可以有備無患，最好就係參加呢個訓練班嘅有錢男男女女互相認識之後，拍埋拖兼結婚，那就誰也不欠誰。
有錢仔女參加理財訓練班頂多只係學習「守富」，不能創富。佢哋嘅財富來自父母，父母財富來自家族生意。他朝有日父母留下一盤生意畀仔女打理，而仔女只係識買基金，搵私人銀行家，請投資顧問嘅話，佢哋點識得守業之道呀！俗語云創業難，守業更難，能守業以至發揚光大，係一門大學問，富豪送一啲二十零歲嘅仔女去學理財，未免操之過急，其實應該首先將大學啱啱畢業嘅仔女放在自己公司，叫佢哋由低做起，行街接單，入廠房或廚房幹活，等佢哋捱番幾年，知道賺錢不易，知道接單要受氣，生產要守程序，借銀行錢要守規律等等，然後送佢哋去讀MBA，之後到跨國大公司做番幾年，學習大公司管理規矩，先至返嚟做中高級幹部，十年八年後接班先至未遲。凱悅酒店集團大股東係芝加哥Pritzker家族，呢家人嘅子弟每年都要到酒店做吓bellboy（擔抬行李），並非高高在上，揸架林寶堅尼返工嘅太子、太子女。
富豪欲子女學習理財之道，使乜咁快送佢哋參加理財訓練班呀？等佢哋到咗三十歲以上，知道做生意賺錢不易之後先至學仲未算遲，有錢仔女二十四歲就學基金投資，好容易認為炒股炒期貨賺錢快速，唔使出一滴汗，又唔使面對勞工爭拗加薪問題，幾好呀！有咁嘅心態，家族生意點交到棒吖。