已故前中共總書記趙紫陽的第四媳婦、資深中國投資銀行家Margaret任克英，加盟法巴嘅消息傳聞多時，噚日獲得證實。法巴宣佈委任Margaret做大中華區企業融資部主席兼行政總裁，佢會向法巴亞太區企業融資部行政總裁夏納恩滙報，而目前嘅大中華區企業融資部主管楊伯豪，就向Margaret滙報。
任克英喺內地擁有廣泛人脈關係，經歷都算傳奇，加盟法巴之前，擔任美林亞太中國投資銀行董事總經理兼主席，亦曾先後喺貝爾斯登及花旗等外資大行工作。
掌法巴大中華企業融資部
佢任職花旗時，策劃過多宗大規模上市交易，包括03年底協助國壽（2628）IPO，集資額高達37億美元。但一年之後，花旗突然終止佢嘅職務，內部文件話佢因為向監管機構提供錯誤訊息，被美國證監會調查，不過最終以任氏並無不當行為作了結。