「你得到我個人，但得唔到我個心！」永遠難忘喺電影《最佳損友》入面，當阿叻（譚室超）慘俾吳君如（Dorlina）施暴時，所講嘅呢句金句，嗰滴奪眶而出嘅無情淚尤其經典。摩洛哥射手查馬克家陣都身陷無奈處境，佢個心根本唔喺波爾多，仲揚晒話為咗想過檔阿仙奴搞到失眠，真係聞者心酸……唔知送個周小姐攬枕畀佢，會唔會令佢瞓得好啲？
「希望球會畀我走」
前日波爾多喺法甲大勝朗斯4:1，哥古夫同埋查馬克延續去季強勢，前者省入兩球，而上季法甲入13球嘅查馬克都唔執輸，入一球加兩個助攻，令波軍開「咧」就即時刷新連贏12場（跨季）嘅法甲紀錄，犀利，但風光背後，原來有人垂淚。今夏一心過檔英超當「兵」嘅查馬克，因為兩間球會傾唔啱價錢，轉會機會越嚟越微。呢位摩洛哥前鋒前日賽前接受法國電視台訪問時大吐苦水：「我一早同球會高層講好想離隊，阿仙奴係我首選，近日我瞓得冇平時咁好，就係為咗呢件事。」到佢好爭氣踢完場波，再重申自己意願：「希望球會總監改變初衷，畀我走啦。」
轉會費傾唔掂數
查馬克講到咁白，點解波爾多仲未肯放人？一字咁淺：錢！據講波爾多為佢叫價1,500萬歐元（約1.5億港元），但阿仙奴眼見25歲嘅查馬克只剩一年合約，所以只願畀750萬歐元。波爾多會長查奧特相信呢單轉會，可能喺今個禮拜有突破性發展，但雙方差價差一倍，除非是旦一邊讓步啫。
平心而論，既然人哋去意已決，波爾多得到個人，但得唔到個心，係咪應該高抬貴手，減價成人之美？；不過以佢當紅狀況，阿仙奴個出價又略嫌低咗啲。查馬克家陣得個等字，但轉會市場仲有廿日至關閉，怕且佢仲有排失眠。