觀乎內地官方近期舉動，心水清者應不難察覺中央正在「較水」。從上周發改委言論到深圳突然研究開徵物業稅，潛台詞擺明係要踩樓市、撐股市，防止泡沫再生。
既然中央水喉繼續開，問題只在於點樣將水流微調，投資者當前急務梗係捉吓阿爺手影。上半年7萬億元（人民幣．下同）新增貸款入面，根據國家審計署數字，地方配套資金到位率只得48%，而流向民生信貸嘅一萬億元貸款，大部份係做樓按，進一步引證社科院之言，有兩萬億錢已流入股市樓市。
不過再睇真啲社科院數字，上半年已有40%中小企沒頂，另有40%正處生死邊緣。發改委一再強調，要拉動內需，須靠救助中小企，但「上有政策，下有對策」，中小企手緊問題一直受忽視，現時股樓市場已告穩定，發改委口中的「鼓勵民間投資健康發展」，很有可能在下半年再出第二套「組合拳」，將資金重新引導入包括農村及中小企領域。
引導資金流出股樓
上周建設銀行（939）話下半年新增貸款將減少七成，即時嚇怕市場，擔心盈利因而受影響。不過另一邊廂，其實銀行已有默契，下半年力谷中小企貸款。呢類貸款利錢一啲都唔差，但最怕係企業「執笠」，增加壞賬風險。於是佢哋諗到條絕世好橋，就係同上海市政府及阿里巴巴（1688）各夾2000萬元，成立「風險池」，係上海市政府首次將有關資金納入政策性擔保體系。上半年建行借出之中小企貸款僅1862億元，只佔公司類貸款32%，只要各省市繼續有類似「風險池」嘅包底安排，既符合國策，中央無理由阻止。
建行雖然諗到好橋，但衰在起步遲，因為原來工商銀行（1398）上半年的中小企融資新加咗4773億元，增長26%，有關貸款佔全部公司貸款比重已達50%，仲有融資餘額近2.3萬億元，水頭充足。睇埋近期工行信貸投放重點係新能源、節能環保等項目，根本唔太受打壓樓市影響，只要壞賬問題唔大，投資者毋須太過擔心盈利增長空間。
若同中國銀行（3988）比較，雖然其中小企貸款增速超過整體貸款增速，但上半年信貸重點仍係鐵道基建、南水北調同災後重建，似乎單係處理中央任命之放貸計劃，已夠晒「開飯」，雖未必有工行、建行咁進取，但勝在夠穩陣，係中長線投資佳品。
胡孟青