曼聯名將舒米高早前為《DiscoveryChannel》拍攝嘅《幹盡苦差事：歐洲篇》今晚就正式喺香港首播，頭炮「門神」就會去到法國馬賽港，球迷將可睇到佢「半天吊」喺離地45米高嘅地方進行掃漆工作（圖），舒米高會處之泰然定係嚇到腳軟？咁就要等觀眾自己睇啦！今集去完法國，舒米高就會去唔同嘅國家工作，好似荷蘭、比利時同意大利等；最後一集返老家丹麥時，仲會睇到舒米高親自落手幫豬搞掂交配，極為搞笑！之不過我求大俠最想嘅係，如果舒米高真係意猶未盡，搞番個《中國篇》、《亞洲篇》嘅苦差事節目就更加perfect！（有線53台及now209台逢周一9:00pm播放）