《經濟日報》老闆馮紹波搞嘅疑似智庫組織香港集思會，噚日集體諗咗11個打造香港成為創意之都嘅方法，主打係將中環變做創意潮人區，包括將荷李活道前已婚警察宿舍改做創意園地。顧問紀文鳳話，創意園地做咩都得，佢鍾意睇書，如果有棟樓可以變做24小時書店，為年輕人提供一個地方通宵飲吓嘢睇吓書。八方睇到家啲後生仔起勢咁搶o靚模寫真、攬枕嗰種熱情，通宵書店吸引佢哋難度相當高。
雖然未必睇通後生仔喜好，但疑似智庫對政府表現就易睇得多，另一個顧問余開堅講到政府開位請創意產業委員會總監時，提醒政府唔好搵公務員做呢個位，皆因「政府可以話係最冇創意嘅機構」，希望以公開招攬創意人才，提升層次喎。