盈盈、樂樂4歲生日快樂！海洋公園噚日搞咗個生日會，送上1.5米高嘅冰製蛋糕為盈盈、樂樂祝壽。「蛋糕」上放滿鮮果，盈盈、樂樂有理冇理，唔理身形論盡同身為國寶應有嘅儀態，第一時間衝埋去大啖大啖咁，又摟作一團，玩得不知幾過癮。
盈盈發情會玩水
4歲原來係大熊貓嘅大日子，代表佢哋正式告別童年，準備開枝散業。海洋公園主席盛智文最心急，生日會上開到口話想快啲做爺爺。海洋公園動物及教育總監吳守堅話，雌性大熊貓一般較早熟，4至4歲半時首次發情，而雄性熊貓就遲啲，5至6歲先開始對女仔有興趣。
吳守堅預計，盈盈會喺出年2至4月期間踏入第一個發情期，到時盈盈嘅活動量會增加，鍾意玩水、發出特殊嘅叫聲，同埋「成日跟住樂樂周圍走」。由於熊貓每年嘅發情期只有兩、三日，可謂機不可失，所以即使樂樂唔領情，海洋公園亦會考慮幫盈盈人工授孕。不過吳守堅話，大熊貓首次發情就懷孕嘅成功率只有三成，所以叫大家唔好心急，順其自然咁話。其實盈盈、樂樂感情咁好，生BB都係遲早嘅事，八方祝佢哋早生貴子！
為咗慶祝盈盈、樂樂4歲生日，所有8月生日嘅市民，今個月去海洋公園都有半價優惠。