近日大市反反覆覆，討論大市要跌幾多，畢竟在高位越高越畏高，筆者都估應該有調整，但士佳認為無論係投資抑或炒股，都應該順勢而行，所以自己在熊市有90%時間做淡友，在牛市有90%時間做好友，熊市期間估頂唔估底，牛市就相反，估底唔估頂。
不要以為士佳係專家，出錯機會同讀者不相上下，好似上一次估大市要跌至17000樓下才夠數，結果期指跌到17050已經拒絕下跌，雖然與士佳心目中距離不遠，當時已開始入第一注，但17050一見即彈，士佳都要追貨，幸好筆者一向將組合分成投資及投機部份，投資部份已有持貨一個牛市的心理準備，而投機部份則按照頂底估算走位。
「微調」是入市機會
前幾期筆者猜大市借滙豐控股（005）做頂下跌，也只是沽掉手上投機部份而已。略有不同的是，上次下跌，個股幾乎沒有跌過，甚至係逆市上升，今次大市下跌，還不夠1000點，個股卻已下跌十幾巴仙，蓋因滙控及中移動（941）追落後，大市其實已較實際情況跌少了，所以，雖然投機部份可以在高位獲利，但筆者組合內投資部份較多，近日下跌，利潤也流走了一截，不過買股票除了考眼光考注碼，最重要的是考耐性，因為牛市利潤不是靠「炒」而來，而是靠「坐」而來的，一直升上來，豬流感、配股供股、中央調控、大小震倉，惟恐嚇投資者唔死，還是耐性最緊要，現在內地流行講動態微調，震倉在所難免。
相反，花旗國有勢復蘇，筆者對上周五美國失業率優於預期並不感到意外，高開之後，美股在當地時間午後仍有力再上，就表示美股繼續反彈的機會較高，不過這邊廂A股表現一般，香港夾在兩者之間，可能仍較為反覆，除非今天期指能收高於20893，否則仍未脫離險地，筆者自己會在高位平倉，候低才補回，如果唔想走來走去，可以持有好倉，沽出認購期權，寓攻於守，大市如要再上，先要擺脫微調陰影，但到時價位就唔同晒，所以微調對我等牛市死硬派而言是入市機會，尤其係內房股，近日早已落後大市，筆者的基金朋友已虎視眈眈，現在下調空間頂多15%，上升空間遠較下跌空間大，筆者已陸續收集車票，等待資產泡沫號再開車。
張士佳
華富嘉洛證券投資服務部董事