夏天唔少人都想曬番一身靚靚古銅色肌膚，但想剝晒衫褲剝晒鞋盡情地曬，香港沙灘近乎無可能。其實港九新界仲有唔少隱蔽沙灘，周末人影都唔多個，好似西貢嘅相思灣，大可解除束縛親親大自然。不過呢類沙灘大都交通不便，大前提係要有車！
記者：徐影龍 攝影：林栢鈞
Model：Mandy
貼住沙灘行都慳番
踏入暑假旺季，連Weekday閒日一樣人山人海逼滿沙灘，要曬得隱蔽，唔想俾大堆四眼麻甩佬眼甘甘喪，大可揀選一啲安全又僻靜嘅沙灘仔。雖然港九新界有唔少選擇，不過大多離泊車位頗遠，行到腳仔軟。個人心水選擇係清水灣道中途轉落去嘅相思灣，可驅車直達沙灘。雖然相思灣無救生員，唔多適合游水，不過喺灘邊濕腳踢吓水，捉吓蟹仔都唔錯。拍攝當日兩點鐘抵達，全場真係人影都無個，寧靜得輕易便聽到海浪聲，趁住陣陣微風吹埋身邊，瞓喺沙灘椅上天然生曬，嗰種完全接近大自然嘅氣氛，果真零舍不同。
相思灣唔難搵，不論由彩虹交滙直入，又或由將軍澳坑口道直上，到咗清雅苑對開迴旋處，跟清水灣路牌直駛就啱。約10分鐘車程開始留意左邊，見一列巴士同私家車錶位，跟住左轉入相思灣路，直落到底就到。
四驅哈仔 上斜好力
今次跟富利堡借車遊山玩水，揀咗架有哈仔之稱嘅豐田Harrier，日本原廠水貨，跟行貨版凌志RX300只差少少豪華裝備。起初擔心捐窿捐罅行山路有啲勉強，不過實際又同揸私家車無乜分別，車身高睇位轉窄彎仲得心應手，連揸開CLK嘅Model姐姐都舞得掂。一行四人，連埋器材同沙灘椅，載重超過650磅，面對30度上斜山路仍游刃有餘，2.4L搭四輪驅動，已經好夠行。就好似人哋話「書到用時方恨少」，遇着今日裝住一大堆雜物，尾廂永遠唔會嫌太大，好彩大大張沙灘椅、攝影器材、幾個大袋等，哈仔全部吞得落。
豐田Harrier
06年出廠、2,400cc、一手牌簿、行駛約24,000公里、全皮椅桃木裝飾、四輪驅動
二手價：$189,000
查詢：富利堡（28776700）
其他選擇
雙仙灣 寧靜少垃圾
嫌相思灣唔多就腳，其實仲有其他選擇。早排《轆Book》介紹過去機場核心計劃展覽中心外面睇靚景，其實喺呢度直落，就有雙仙灣。由荃灣愉景新城梅安路直入，去到青山公路汀九段，左邊見到一堆停車錶位就係機場核心計劃展覽中心，呢度有錶位畀你安心泊車，泊好車後沿石級樓梯直落就到。由於屬關閉泳灘，且交通不便，人氣全無，但好處係環境相當幽靜，而且沙灘無乜垃圾，除咗大解放曬太陽，帶靚女嚟影沙龍都唔錯。缺點係要行成百級石階上落，都幾辛苦。仲要提一提大家，雙仙灣被評為水質欠佳，落水就唔好啦。
雙仙灣環境優美，唔裸晒，嚟影沙龍都正！
