所謂不死鳥，係指可以喺大火中不死重生；外號「喜鵲」嘅紐卡素前日就喺極惡劣環境下，憑後備門將告魯爾力挽狂瀾，作客迫和西布朗1:1。如今喜鵲化身為不死鳥，絕境逢生後奪標行情上漲，犀利。
話呢隻喜鵲處困境，係隊長史提芬泰萊日前鬧球會高層不知所謂之餘，隻臭馬祖爾巴頓又發作，喺賽前操練時同兩個阿根廷佬約拿斯古迪利斯、高洛仙尼炒大交，衰到拂袖而去。呢單嘢邊個啱邊個錯冇人知，總之祖爾巴頓最終被貶後備。
後備門將「上身」
好啦，落場啦，紐記展開英冠之旅即刻撼升班熱門西布朗，大部份時間捱打，喺39分鐘俾對方嘅舒爾頓馬迪斯攻入。咁都未算衰，正選門將夏柏勇戰受傷，半場要換入21歲嘅後備龍門告魯爾。主將賽前鬧交、落後，再冇埋個正選龍門，呢鋪仲唔死？
就係唔使死！窮途未必係末路，絕境也可以逢生呢句話原來係真，邊個估到告魯爾呢個荷蘭後生仔落場後表現神勇，救出多個據報係必入球，而單係佢救波當然唔夠，杜夫喺55分鐘為紐記扳平，亦應記一功。至於個荷蘭仔，雖然05年加盟紐卡素，唔係打後備就係被外借（福爾柯克、卡素爾），但原來以前都有過威水史，踢過荷蘭U21，仲喺06年11月歐協盃對巴勒莫時為紐記把關，先後擋出過敵軍迪米捷利、古斯比比亞華等人嘅埋門，被英國傳媒大讚救球反應快。
莊家即列爭標大熱
好啦，紐記今次唔輸，士氣應該提升唔少，由於整體表現比預期好，又突然殺出個上身嘅門將，所以有外國博彩公司列佢哋嘅英冠奪標賠率為7倍，同西布朗並列大熱門。舒利亞已經開晒聲話只要個箭靶班主艾殊利賣盤成功，佢就有心返去教，一切順利，呢隻不死鳥就真係唔講得笑。