「樂於助人」，細細個開始已經有人話你知係美德。但係人大咗，助人？有無着數先？係咪靚女先？唔少人都要計一計。不過最近有油公司唔信邪，一於要喺路邊測試香港人嘅好心程度，雖然扮求助嘅都係美少女，但係當一發現好心有獎，竟然唔少人（甚至狗）都即時嚇呆咗。咁咪證明咗，香港仲有唔少人係相信，「施恩莫望報」囉！可喜可賀。
記者：梁美甜
攝影：林栢鈞
靚女扮壞車
喺馬路上，如果突然有人走埋嚟話壞車要幫手，你會點？呢日，我就有份匿埋一旁，偷偷見證一下香港有幾多好心人。地點：旺角太平道，時間：某周日上午，測試方法：美少女將車停喺路邊，打開頭冚扮壞車，請求路過嘅車主幫手。心諗，雖則有靚女，不過大熱天時搵人整車？我就唔係咁樂觀囉。不過搞手就滿懷信心，話根據經驗，「一係唔問，問親對方都一定出手幫忙」咁話。好啦，就本住實事求是精神，嚟次全程直擊！「壞車」、靚女準備就緒，開始做戲！每當有車喺附近泊好位，靚女就一臉慌張，上前請求幫忙……
人狗一齊高低眉
測試行動由早上十時半展開，歷時兩個半小時左右，總共約有七八個司機被截停要求幫忙，結果竟然係百發百中，所有目標司機都願意走過嚟幫手，我即時跌晒眼鏡啦！可能好多人會話，靚女梗係有人幫，不過現場所見，樂意幫手嘅司機有男有女，最有心嘅一位男士老遠走過嚟，一到就即時蹲低檢查車胎，見無事仲開車門再睇個究竟，完全無瞄靚女一眼。一心以為男人就一定「醉翁之意不在酒」嘅人，似乎膚淺咗少少。高潮係一班攞住草球嘅大使突然衝出嚟講「恭喜你」嘅一刻，幾乎每個好心人都大吃一驚，甚至即時彈開幾步，真性情肯定無做媒。最忍唔住要笑嘅係睇見一個抱住狗狗嘅猛男，人狗一齊嚟個高低眉錯愕表情，場面有趣！好嘞，我都信啦，香港原來真係仲有唔少好心人！
直擊！
呢個係兩個幾鐘頭內多次出現嘅場面。
佢哋點解咁好心……
搞手話感動
一連串大陣仗活動嘅搞手，原來唔係香港人，而係埃克森美孚香港有限公司嘅馬來西亞籍華人董事黃錦賢。好彩香港人無失禮，仲令佢大為感動，驚訝香港人「幾有心」。「設身處地，我都有過需要人幫忙嘅時候，今次活動主題係『至有您心』，目的係想提醒駕駛人士要多關心其他人。結果令我好驚訝、好開心，仲證明咗香港好多駕駛人士係非常樂於助人，好願意主動伸出援手。」
好心有獎
老人家過馬路慢吞吞考你耐性、一泊車就有個o靚仔慌失失走埋嚟搵你幫手、仆住返去補錶嗰陣突然走嚟幾位靚女幫你入錶……原來都係呢個「至有您心」活動嘅測試項目，活動會搞足成個暑假，即8月內嘅星期六、日都會繼續搞搞震，做咗好心會有禮品！攞完禮物仲有相影，之後會放上網等大家一齊投票，勝出嘅有機會贏$2,000油券！
網址： http://www.facebook.com/event.php?eid=132842524072&ref=nf
