小妹呢幾日不斷收到一個email，係嚟自一個喺深圳，叫做郵箱互聯網信息中心，佢話小妹嘅郵箱賬號被系統抽中成為幸運用戶，獲得二等獎，獎金有人民幣38,000元，同埋一部三星筆記簿型電腦。email附有一個獲獎幸運號碼「5188」，只要登上活動官方網站 http://youxiang.txktp.com/，輸入個幸運號碼，就可領取獎品，名額有五個。
吓，無端中大獎，真定假？小妹即刻登入郵箱互聯網信息中心嘅網頁，網頁大字標題話為慶祝10周年，同三星電子合作舉辦抽獎活動，獲抽中嘅幸運兒只要憑郵箱賬號同幸運號碼，登記個人資料，再致電工作人員確認身份就可以安排領獎。
先要滙款逾千元手續費
個網頁做得好認真，有地址，仲有深圳公證處發出嘅抽獎公證證書圖片，獲獎人名單同相片，以及有穿上三星制服人員介紹三星電腦嘅片段，唔似係假嘢。
點知再睇落去，話要先滙款人民幣1,380元手續費，先可以攞到獎金同電腦。咁樣有啲景轟喎，小妹即刻打電話去該網站，但電話接唔通。小妹咪上網Check吓呢間公司，發現佢喺深圳惡名昭彰，被人踢爆抽獎為名，呃人為實，唔少人被騙。內地三星公司已否認與該中心合辦抽獎活動，深圳公證處都否認為該抽獎活動進行公證。
呢間信息中心都狼死囉，呃完內地人又想跨境呃香港人。好在小妹醒目，一句到尾，平宜莫貪。
電郵：mailto:[email protected]