煲呔話自己飲香港水流香港血，扮香港之子，其實佢飲嘅多數係東江水。呢個港人食水之源受城市化同工業發展污染威脅，地球之友啟動為期10年嘅「飲水思源」東江源頭保育計劃，上月召集來自香港、廣東同江西15名「東江之子」義工，展開18日保源活動。
東江之子任務包括向鄉村小孩授課、落河清理垃圾同植樹，幾個來自香港嘅東江之子陳振詞、周瑜敏、梁樂鋒同馮耀輝都承認，從冇諗過東江源頭係點樣，親眼目睹先知係一個小水潭，好鬼意外。
港人擰開水龍頭就有食水，去到東江源頭食水供應反而唔穩定，村民要靠竹製水管引山水用。地球之友董事吳方笑薇話，一般人唔明白源頭農戶可能要為保護水源作出犧牲，飲水思源保育計劃希望用水者回饋，日後期望可招募建築師、教師等專業人士到源頭做義工。