政府剛公佈新一輪署長級官員調動消息，多數人升官，漁護署署長張少卿卻要降級，原本係署理D6級署長，調到物流服務署變成署理D5級，每個月收少幾千蚊人工。
其實張少卿降級唔一定係壞事，事緣佢做漁護署時，頂頭上司係食衞局常秘孔郭惠清，官場消息指孔太同張少卿火星撞地球眾所周知，甚至出現有你冇我局面，特區政府要促進和諧，呢啲時候做細嘅點都輸蝕啲，張少卿咪要屈就吓先囉。
雖則微降一級，但由於張少卿係D4級官員，署任D5只係人工少咗，日後晉升不受影響，一年後待晉升委員會再開會，只要表現好可以再見board，仍然有機會正式升上D6。打政府工有咁嘅好處，如果做私人機構，同上司唔咬弦早就要拜拜。
黎以德等做常秘
今次官員調動仲有個微妙安排，工貿署署長黎以德舊年先升正D6，今次平調做運輸署署長，好可能係升官前奏，因為佢嘅新上司運輸及房屋局常秘何宣威出年退休，而黎以德同局長鄭汝樺關係好好，所以官場中人估計黎以德到運輸署只係中途站，下一站係做常秘。