一位吉隆坡朋友告知，近金河廣場，離滙豐銀行唔係太遠，由JalanBukitBintang行過去，見到有一間好大嘅KFC，轉右直入就搵到一條阿羅街（JalanAlor），係吉隆坡一條著名嘅為食街，可以一試。左丁山按指示，行咗十零分鐘，卒之搵到，嘩成條街都係食檔，鑊氣冲天，烏煙四溢，味道吸引，乜款食物都有齊，露天枱櫈擺到落馬路，但係邊一檔最好食呀？環境衞生似乎差啲噃，我哋香港人唔係幾慣。你知啦，香港地貴、人多、街道擠塞，又有消防交通條例，連小小露天茶座都會令食環署不高興，呢類阿羅街點可以在香港存在呀？住在街道兩旁嘅居民唔投訴空氣污染、石油氣爐夠危險先至奇。正是一處鄉村一處例，鍾意投訴乜，投訴物嘅香港市民，好難容忍一條阿羅街嘅存在。但馬來西亞人覺得好冇所謂，食街大牌檔係當地特色，吸引遊客㖭。
唔敢在為食街覓食，卒之走番去唐人街（蘇丹街）嗰間「南香」，食芋頭扣肉與福州魚丸就冇得彈嘞，肥腩肉入口即融，正斗之至，但招牌飯「海南雞飯」就令人失望咯，乜同幾年前嘅味道差好遠嘅？雞肉夠硬夠韌，唔及格噃，但此店有招牌名譽，生意好到極，朝早十點到中午三點開門營業，食物日日沽清，直情好似印銀紙。後來問番吉隆坡朋友，佢話「南香」創辦人已過身，太子爺移民澳洲做牙醫，唔肯返大馬繼承事業，故此「南香」已經換咗老闆，作風與從前不同喎。
海外華人家族小生意往往係咁，創辦人憑雙手創業，一生辛苦做手作仔搵大錢，送仔女留學、留洋。仔女做晒專業人士，就不願回歸繼承父業，於是家族生意玩完。朋友話馬來西亞華人下一代尤其不滿國家政策過份向土著傾斜，有機會在外國立業就唔願意回歸，即使搵少好多錢都係自願嘅。
返到香港，睇報紙講及食環署官員見過發展商後（按：應係講戲院里皇后戲院重建），就向甘乃威議員通知，有關擦鞋匠發牌事宜。甘議員要食環署「企硬」，否則轉移地點要重新諮詢。何謂「轉移地點？何謂原地？」左丁山睇到一頭霧水。記得戲院未拆前，有擦鞋匠在永安人壽大廈（近電車路）牆邊擺檔，戲院拆咗之後，擦鞋檔搬到戲院里地盤外，如果話「原地」發牌，究竟邊度先至係「原地」呢？香港就係咁，為咗少少嘢都可以拗餐死，勞煩尊貴的議員喝令官員「企硬」，令有關官員完全僵硬，全無彈性，呢啲算唔算叫做「內耗」呢？