保華集團（498）上星期五上億股成交，係三個月以嚟最大成交日，無他，港口股當中，保華超落後。保華連埋供股後嘅最新NAV0.88元，現價（0.395元）折讓55.5%，PB0.45倍。市場裏邊嘅中資港口股，大連港（2880）PB1.4倍、廈門港（3378）PB1倍，天津港（3382）PB更加上到1.6倍。秤PB，保華吸引力彈晒出嚟。
保華呢幾年，專注打造「長江策略」，沿長江流域，建設大宗散貨港口網絡，兼且已經成形。要咁睇，中央國策之一，係以長三角地區作為重要經濟龍頭地位，加埋中西部大開發，保華所建構嘅長三角港口基建網絡，中線增長潛力龐大。呢期阿爺推出4萬億刺激經濟措施，基建項目亦佔好大比例，照計數，保華核心業務，亦應該受惠，2010年度業績，應該冇問題。呢轉博保華翻半番到0.59元，PB仲係低企1倍樓下，未有耐追到同業。
第一上海一蚊撈一轉
第一上海（227）上年底止，揸現金10.9億銀，借貸得340萬銀咁大把，每股淨現金高達0.78元，個市呢期轉趨波動，第一上海超級現金牛，防風力強好多。再講，集團最新NAV1.66元，現價（1.15元）PB0.69倍，又有唔錯折讓墊底。
股市今年以嚟表現唔錯，第一上海雙重受惠港股及B股上升，核心證券及經紀業務，肯定好轉，可以炒業績回穩。呢轉短打，見第一上海跌到1蚊支持區撈一轉，上望1.25元，潛在回報率25%，集團仲未有耐上到1倍PB水位。
錢雋