下任特首「黑馬」梁振英噚日黑衣上陣，出席自由黨派發「書中自有黃金屋」消費券活動，想同年輕人分享讀書心得，可惜現場人士反應麻麻，冇人問佢閱讀心得，只有兩個年輕人分別問佢搵工技巧同仔女讀書成績。梁振英做事向來有備而來，為免全場deadair咁尷尬，即時攞本書出嚟好書推介。
梁振英介紹嘅係中文大學輯錄部份EMBA課程內容嘅《與CEO對話──英雄造時勢》，佢形容呢本書「連小三學生都睇得明」，唔好一聽到EMBA就驚，「只要一個字一個字睇，一句一句睇，你哋就會明o架喇。」
連講十個「冇」字
近排頻頻曝光造勢嘅梁振英，介紹好書搵正「英雄造時勢」，微言大義不言而喻，不過活動結束後，記者問佢係咪借題發揮表白心迹，佢卻一連講出十個「冇」字連聲否認，「冇冇冇冇冇！冇冇冇冇冇！呢本係好易睇、好易睇嘅書，係值得睇。」佢又解釋，話可能有人覺得呢本書題目好深，佢建議只要一步一步慢慢睇就有收穫，「好似行山、爬樓梯咁，一步一步爬上去。」
有記者問佢出選特首係咪都要英雄造時勢，梁振英即時表演扮儍，反問：「你講緊邊個選特首呀？我幫你問吓佢。」唔知邊個選特首？唔好是但噏喎！如果佢真係可以幫手，八方最想拜託佢問問唐英年係咪選特首，相信梁振英自己都好想知道答案，不過佢瞬即鬆人。
扮儍之餘，梁振英噚日又忽然認低威，「我連熱門嘅前提都冇」。又指自己30年前已有寫文章議政，兼積極參與社會活動，並非近日先忽然高調咁話。係熱門定冷門，八方相信梁振英自己心中有數，而佢「恨」選特首可謂路人皆見，否則會幫自由黨抬轎出席派消費券活動？
自由黨唔怕呷醋
自由黨副主席方剛強調請梁振英主禮唔代表自由黨轉軚支持佢選特首，而且距離2012年仲有3年時間，相信唐公子唔會呷醋嬲自由黨幫人造勢。
政治變幻莫測，有時一日都嫌太長，時勢造英雄，定係英雄造時勢，家陣冇人知，況且振「英」可以造時勢，「英」年難道不能？
mailto:[email protected]