【第37屆港姐之一針見血】白韻琴昨日現身無綫港姐宣傳活動，反客為主繼續出位，連珠炮發狂轟無綫製作節目唔夠料及質素差，又彈應屆佳麗難以擔當美貌與智慧並存之名，更揚言其男友謝偉俊（Paul）嫌港姐質素差，比不上曾與Paul傳緋聞的青島索女。
十位應屆候選港姐昨日在尖沙嘴出席《雪完美─美麗故事由您創造》宣傳活動，眾佳麗分別在台上描述產品用後感，2號林潔瑜勝出獲得價值三萬元纖體美容療程，雪完美代言人陳煒和李彩華均現身撐場，陳煒婚後過少奶奶生活，自言有點悶，遇到合適工作會復出。
「靚女唔知去晒邊」
白韻琴應邀現身活動上，但對一班候選港姐有彈冇讚，她說：「我第一次見啲女仔，阿Paul（謝偉俊）就係睇咗報紙所以唔嚟，唔知係咪唔夠啲青島……（意指與阿Paul傳緋聞的青島索女），個個都好似友誼小姐咁，冇殺傷力，好多要改進地方，以前啲港姐靚好多，唔靚都好有性格，啲靚女唔知去晒邊。」有指o靚模比起港姐還省鏡，白韻琴說：「做o靚模都幾好，周秀娜都幾靚，我做男人都鍾意，你係男人鍾意睇周秀娜定呢班港姐，無綫要做多啲嘢吸引靚女參選，啲靚女智慧同美貌都好『掹』。」
問到白韻琴有何提議，她矛頭直指無綫製作質素：「啲電視節目都好掹，成日都飲飲食食、爭產、包二奶，食wasabi俾曾志偉玩，好似白癡咁，缺少益智節目，所以無綫被聲討唔係偶然，節目吸引唔到青少年，好似益智節目國家地理又要畀錢，但唔係個個畀得起，多咗青少年去吸毒援交，政府應發多啲電視牌照，多啲競爭，節目好多青少年睇自然多靚女參選，家實在唔夠料。」
佳麗自稱具溫柔美
9號袁嘉敏對於白韻琴的批評就反擊說：「要邀請佢近距離嚟接觸，選港姐唔需要殺傷力，友善同溫和係另一種靚，反而順眼啲，殺傷力行天橋較適合，可以令品牌建立sharp形象。」10號李姿敏則表示經無綫挑選入圍已證明有美貌，對參選有信心。
採訪、攝影：卓寶花
