特首煲呔明日起放假一星期，行開前政府噚日宣佈多名高官調動安排，運輸署署長黃志光調任漁護署署長，工貿署署長黎以德出掌運輸署，物流服務署前署長關錫寧做工貿署署長，漁護署署長張少卿就接掌物流服務署。
創新科技署署長陳育德退休，由發展局副秘書長王榮珍頂上，保險業監理專員張雲正過檔做郵政署署長，佢個位由商務及經濟發展局副秘書長蔡淑嫻繼任，而行政長官副私人秘書李百全會出任公務及司法人員薪俸及服務條件諮詢委員會聯合秘書處秘書長。
陳育德之前做食環署時連續處理幾單食物事故，真係冇日安寧，轉職創新科技署後風平浪靜，退休前總算有番啲安樂日子過吓；張雲正本來舊年就去郵政署返工，不過金融海嘯殺到嚟，佢要實保險公司會否爆煲，搞到郵政署副署長陳猷烽署任署長差唔多成年。