退咗休嘅天主教香港教區主教陳日君樞機，自從搬咗入聖神修院之後，可能因為居住環境改善咗，越嚟越多鬼主意，早排開咗個blog，不過post完兩次之後就唔見影，等到粉絲頸都長，連佢自己都話犯咗棄嬰之罪「該死」。
點知話口未完，佢又搞搞新意思，同青年、修女玩交換周記，第一篇已經放咗上網。樞機話，啱啱呢個月有三位兄弟分別返咗天主度，令佢好大感觸，引咗首新學返嚟嘅歌《AbidewithMe》表達感嘆，首歌講人世間嘅悲傷歡娛，終究會過去，環境變化，無從掌握，聽到八方都眼濕濕，唔知後生仔明唔明呢種無奈呢？佢哋又會點回應樞機呢？惟有等下個禮拜分曉。