今年書展和動漫節，全是周秀娜的獨腳戲。翻開其寫真集，激蕩32D熱溶雪糕杯；但當收到貿發局密令，現身簽名會又變得平平無奇，比幻海奇緣更奇幻。不過周秀娜的咪咪並非不能說，還向少女們分享其變幻術的箇中秘密——就是靠一對nudebra。
撰文：比華利
周秀娜憑新一代性感女神形象胸降上位，但她並不會因為走紅便要錫身封胸，相反為延長自己的o靚模壽命，還決定下苦功學做打女。周秀娜直言受荷李活女星安琪蓮娜祖莉（AngelinaJolie）的成就影響而有此決定，她說：「我一向好欣賞安琪蓮娜祖莉，佢喺電影嘅身手好敏捷，而且佢嘅行事都對社會好有貢獻。除咗佢，其實我細細個已經都好鍾意睇楊紫瓊嘅打戲，睇得出佢係付出好多努力。」周秀娜轉做打女，可會收起性感，她即向電車男送定心丸：「唔會，打女都可以好型o架。」
願扮醜女拍笑片
周秀娜可會像鍾欣桐一樣向詠春大師冼國林拜師學藝？她說：「功夫都分好多瓣，不過我唔會學詠春啦，我會主攻泰拳，下個月公司會安排我跟泰拳老師上堂，我主要學一啲拳腳功夫，學吓起腳同轉身啲基本功。」周秀娜自問性格牛王頭，雖然自知功力未能達到泰國功夫明星TonyJaa的好身手，但她笑言都想做「周JaaJaa」。
周秀娜續說：「我自問幾搞笑，有時都好想經理人公司安排我試吓拍笑片，夥拍星爺（周星馳）我就唔敢高攀，佢拍嘅笑片真係百看不厭，至於鄭中基就算新一代笑匠，只要有機會拍喜劇，要我扮醜女都冇問題。」
親解構神奇咪咪
不過，周秀娜醜極有限，未知拍笑片可介意拿32D巨咪開玩笑？現實生活，周秀娜咪咪一時波濤洶湧，一時波平如鏡，這招變幻球技相信令波平如鏡的少女都想知箇中秘密，她直言全憑一對nudebra，她說：「Nudebra真係好幫到我營造豐胸效果。」周秀娜認為做真女人，必須識為自己挑選貼身的內衣，她說：「我買bra幾講究，因為一個好bra真係會突出身材嘅優點，我嘅衣櫃有幾十個bra，佢哋嘅款式偏向簡單，當然我都鍾意買喱士bra，可以配唔同衫着，我買親都唔會太貴，每個最多幾百蚊。」
當周秀娜拆招完假胸疑雲，問到可接受整容手術，她不排除他日年華老去時，要利用整容來保美態，她說：「我暫時呢刻都滿意自己body上任何一部份，但遲啲老咗就唔知，整容都係好個人嘅嘢，就同化妝一樣，又冇影響到其他人，我覺得冇乜所謂。」周秀娜笑稱屆時未必一定要拉臉皮，反而視乎將來整容手術的技術達至何種水平，才決定用那一種技巧「變臉」。
箍牙笑得更甜美
但貪靚的周秀娜近日都低調箍牙，希望讓笑容更甜美，她說：「其實我啲牙天生都幾整齊，但有啲向入生，家用透明牙箍，希望將啲牙推番出少少，咁笑起嚟會靚啲。」對於被傳媒翻舊賬，指她出道期的國字臉形，跟現在瓜子臉，明顯有不同，她說：「我諗係因為細細個有babyfat，家大咗就冇晒啫。」
人紅是非隨之而來，周秀娜一於好少理，難道不介意其他藝人乘機抽水博宣傳，她說：「冇所謂，無論為抽水，或者幫我嘅新聞宣傳，睇佢哋心態啦，或者佢哋真係好想發表意見呢。」
「男友笑我大食」
現年24歲的周秀娜雖迷倒一眾電車男，但令性感女神神魂顛倒的卻是型男金城武。可是偏偏她的身邊人、髮型師男友Avis卻丁點找不到有金城武的影子，她笑言：「不過我當正佢係，先同佢拍拖。」周秀娜從不避嫌有男友，二人已拍拖兩年，女方事業上位，以往憧憬25歲嫁人的周秀娜已改變主意，她表示最少30歲才肯加入師奶行列。
心念金城武
周秀娜爆紅，連累Avis卻被揭底牌，他更被指是軟飯王，除有傳座駕MiniCooper由周秀娜貼錢送贈，周秀娜又大膽推出肖像噴血攬枕，旋即升呢成為男人性幻想對象，Avis大方如此，難怪被質疑經濟支出都是女友拋胸賺來的血汗錢。
愛得癡纏的周秀娜馬上走出來做Avis人肉擋箭牌，她說：「我要澄清，我識男友前，佢已事業有成，佢擁有自己嘅髮型屋，佢好有上進心。」周秀娜堅持與男友交往時保持經濟獨立，她說：「佢好錫我，佢係一個好有風度嘅男仔，出街食飯都係佢畀錢，我屋企嘅負擔就一直冇問過佢。」周秀娜指男友錫到燶，但有時卻嫌她「大食」，她說：「我好食得，佢會笑我大食，我哋好少為其他嘢嗌交。」
現實生活無緣戀上金城武，周秀娜寄望有幸做對螢幕情侶，她更退而求其次：「如果女朋友唔得，做佢細妹我都制。」
攝影：葉君海
化妝：MeeganSeak 髮型：ZapofChin.G
服裝：JFT 場地：AnaOyster&Grill
