殮房陰氣重，一般人都不願久留，衞生署早前公開招聘兩個殮房服務員，入職申請啱啱截止，有成3,000幾人應徵。雖然呢份工冇學歷要求，不過八方知道申請人quali好勁，唔止有大學生，甚至碩士、博士生都入紙申請，為咗搵食，人人都百無禁忌，何況重賞之下必有勇夫，呢份工起薪點成萬四蚊o架，最多第時帶多幾道符返工啫！
好多人批評時下年輕人只愛o靚模、冇承擔，呢份殮房工咁多大學生爭住做，證明香港新一代好願意為人民服務。需知道在殮房工作難度真係好高，日常工作包括負責接收送嚟殮房嘅屍體，然後送入屍櫃貯存，死者家屬嚟認領時，要幫手開櫃拉開屍袋。
3000人爭做殮房服務員
衞生署講到明，做呢份工冇任何學歷要求，識講廣東話同簡單英文就得，反而要有番咁上下體能，因為運送屍體係粗重工作，絕對唔係攬吓o靚模攬枕咁輕鬆，仲要協助法醫剖驗屍體及事前事後清潔工作，總之殮房內嘅大小事務幾乎都要一手包辦。加上份工要輪更，月黑風高或者十號風球橫風橫雨都要當值。
要做好呢份工似乎唔容易，但如果入職五年又表現良好，有機會升為較高級嘅殮房技術員。衞生署現有28個殮房服務員，流動性唔係好高，因為有人辭職或退休先出現兩個空缺，對上一次招聘殮房服務員喺07年，當時有12個空缺，吸引1,207人申請，已經好墟冚，今次逾3,000人爭兩個位，破紀錄不特止，直情盛況空前爭崩頭。
有醫護工作經驗優先
競爭咁劇烈，碩士、博士卻未必有着數，入殮房做最緊要有經驗，衞生署話由於太多人申請，所以會訂立審核次序，唔會面試幾千人，若果具備兩年喺醫院、政府診所或其他醫護機構工作經驗會優先獲面試機會，預期10月開始面試。
經濟唔好，鐵飯碗吃香，做殮房係筍工，政府物流服務署請二級物料供應員，貨倉工作都有幾千個大學或以上學歷嘅人爭。下個月政府開始招聘AO、EO，10月又會請政府律師，三個職位起薪點由二萬幾蚊至四萬幾蚊，估計有數以萬計申請者。
mailto:[email protected]