邵氏那個盾牌形SBlogo，邱禮濤等足邵氏停產的22年，以為憑執導電影《LaughingGor之變節》等到了，邵氏卻要改招牌。從《人肉叉燒包》到《陰陽路》，由《我不賣身，我賣子宮》的影后劉美君到從電視再度跳出銀幕的Laughing謝天華，導演邱禮濤經歷了電影事業高低潮，拍過cult片爛片話題電影，如今拍埋電視劇產物，26年來得出四字真言——適者生存。
撰文：藍文浩
適合市場不等於完全妥協，就如現實中，正與邪從來都難定分界，擅長描寫黑與白中間那一塊灰的邱禮濤導演，執導邵氏重整旗鼓後的首部電影《LaughingGor之變節》，他日前笑說：「真係好榮幸，細個睇幾多邵氏嘅戲呀，我連續開工一個禮拜冇得瞓，一上車就瞓着，都係為咗部戲有邵氏個SBlogo，點知家話要改。」
兩個字母加上盾牌形狀，令導演朝思暮想，邱禮濤續說：「我接都係希望有部戲有呢個logo，雖然係好老套，但係呢個唔係貶義。」明白明白，那盾牌logo的經典程度，就等於小時候看西片那張開口搖頭怒吼的大獅子。
天華壓力變動力
Laughing哥謝天華在無綫劇《學警狙擊》死過翻生成全城熱話，更由公仔箱跳入大銀幕掛頭牌拍前傳，繼續置身黑白灰中間做邊緣人，保住人氣谷票房，演員、導演都有壓力，不過邱禮濤說：「其實set死咗個角色仲易有題材啦，我哋要構思佢嘅過去係點樣，強調佢點樣去揀條路，都係抉擇嘅故事。」路邊社消息：黃秋生本來拒絕接拍，但因為與導演深交又有知遇之恩而應承，邱禮濤說：「唔係，秋生一聽完故事就好爽快應承，佢好鍾意個角色。我同佢唔講呢啲嘢。」
一眾主要演員都拍慣TVB倒模劇集，可會只得A表情B笑容？邱禮濤說：「天華好緊張部戲，佢因為部劇而紅咗，仲拍埋電影，緊張但係都係好正面嘅，咁樣令佢全力以赴。法拉幾好，但係呢部係男人戲，剛陽味重啲，佢就係Laughing身邊一個人，佢女朋友。呂慧儀幾突出，古仔入面冇刻意經營，但係佢一做就覺得好突出。」無綫被戲稱為CCTVB，邱禮濤不怕有觀眾會對電影先入為主，還是自有一套想法，他說：「唔怕，我真係唔會介意，正如有一班最索嘅女企喺度，都未必個個人都鍾意啦，只要大部份嘅回應係正面就已經係好好。」
打入內地有難度
香港電影其實早已變成中港電影，內地資金殺到，香港老闆又要投靠內地市場，邱禮濤說：「家多個老闆（邵氏）玩，雖然個行業真係低潮，但係有老闆肯搞，個象徵意義好好，睇吓3部之後邵氏電影再點發展啦。」但電影要合香港口味，更重要的是合乎內地的尺度，要妥協同時又不可太過妥協，邱禮濤說：「希望內地市場、制度同視野都開放啲啦，要拍到（內地認可電影）係難，但唔係冇可能。」
另外，cult片迷喜訊是影藝戲院重開，但在導演眼中，卻同樣是象徵意義比較大，邱禮濤說：「電影工業內未必係一個好消息，好似係多咗個頻道放小成本片，但係會唔會咁就多咗人睇戲呢？歷史上睇好似係唔得喇。」
我是誰：Cult片大導出頭天
現年48歲的邱禮濤，是嶺南大學文化研究碩士，學生時代已拍攝獨立短片。他執導的電影，恐怖、血腥、勵志、喜劇、黑幫片樣樣齊，大多是低成本製作，尤以cult片聞名，93年拍攝《八仙飯店之人肉叉燒包》，帶挈黃秋生首奪香港電影金像獎影帝，至於另一齣《伊波拉病毒》，曾獲歐美影評人和觀眾喻為CultClassic。至於《等候董建華發落》除了獲提名金紫荊獎最佳導演外，亦成為柏林影展「Panorama」開幕電影。早前執導的《我不賣身，我賣子宮》，造就劉美君奪金馬影后。
