家啲全高清iDTV除咗鬥大之外，仲鬥埋「細」。早幾日LG銷售經理Martin搵咗小藍去佢哋嘅北角office話有嘢傾，啱啱推出全新嘅LGLU50系嘅iDTV液晶體電視機。
呢輪都好多品牌出新機，咁有乜持別？Martin笑笑口話，呢個系列嘅賣點喺一線牌子嚟講，全港首部22吋同26吋全高清嘅iDTV，「家啲消費者要求越嚟越高，擺喺房嘅iDTV都要全高清，咁我哋咪率先推出囉。」
玩專業級調校
Martin話，唔好睇少部機得22或26吋，功能比Hi-End大機一啲都唔輸蝕，唔單止配備HDMI1.3接駁端子，色域擴闊咗之餘，仲有埋24pRealCinema技術，以每秒24格嘅速度播放電影，啱晒電影發燒友口味。部機最特別係全港首部iDTV用咗ISF（ImageScienceFoundation）技術，畀消費者玩吓專業級調校畫面，根據家居環境光亮度，透過ISF調校一個更準確、色彩更鮮明嘅畫面，「新機出廠設定係根據陳列室嘅需要嚟設定，如果客人喺家居內用陳列室嘅設定，畫面質素會因而降低，電視壽命又會減短。」
小藍呢排喪打機，都係喺廳駁埋擴音機嚟玩，但有時夜晚打機唔想嘈到屋企人，都想買部全高清iDTV擺喺房煲機兼睇電視，大牌子22吋賣3,589蚊都可以考慮吓，26吋就未定價。