周刊訪問搞起Lamo熱潮的生意人，吼準書展悶兜兜一池死水的弱點，發動人肉攻勢，即時抓緊傳媒鏡頭，全城四十歲以下的維園阿伯和三十歲以上的電車男嘔晒白泡翻晒白眼，掏腰包掃貨，攬書攬枕幹其御宅的好事。Lamo就是這樣大賣的。搞起這盤生意，的確有兩度散手。
而生意人打算食住上，遲下會推出Lamo男裝版。近來面見過三四十人，結果呢？「全部唔掂，唔係太man就係思想空洞，無個人魅力。」
o靚仔四肢發達，心諗，女人上胸發達都得，我點解唔賣。喔原來要考諗頭。思想空洞？唔係睇錯吧，家下揀特首辦心戰室幕僚嗎？唔係搵局長係嘛。思想唔空洞，一早做了民建聯和幼齒梁振英啦，還用赤膊扮郭富城俾人interview驗「鵰」？
而我也懷疑，時下o靚仔，會有幾man。除了出入中區那些健身狂，和蘭桂坊那些疑似富貴鴨/鵝的胸肌男，平時撞口撞面那些都是排骨精，寒背，烏嘴狗面相，穿賴屎褲扮A貨陳小春，釘耳環當自己是MK謝霆鋒。這些o靚，用man形容他們，太抬舉了吧。香港男人就是man太少，man毛都少過人，通街通巷盯實周秀娜唔眨眼的不是man，是佬。