一班亞姐前晚到蘭桂坊招募新一屆亞姐，並即場向靚女派發報名表，其中筱靖在現場撞見偶像馬國明拍攝無綫新劇《談情說案》，她即如螞蟻摟蜜糖飛撲埋身希望和偶像合照，但馬國明即時被工作人員拉開，兼且全組人避走，搞到筱靖當場瘀皮出醜。
應屆亞姐亞軍顏子菲及幾位亞姐包括張文慈（Pinky）、袁小曼、陳莎及筱靖等，親身到蘭桂坊宣傳新一屆亞姐開始報名，並即場向靚女派表格呼籲她們參選，一眾亞姐皆身穿露肩或吊帶裙現身，其中袁小曼和Pinky更谷胸上陣，難怪吸引不少蒲友及自由行旅客影相。
「見到佢我想喊」
當亞姐出現時，剛巧馬國明在現場拍攝無綫新劇《談情說案》，筱靖更自稱是他的fans，故此即時飛撲上前希望和馬國明合照。但無綫工作人員見狀即時停機兼拉走馬國明，並且隨即離開現場，筱靖當眾出醜瘀皮，她說：「我好鍾意馬國明，鍾意咗佢10年，一見到佢我真係想喊，我真係好想同佢合照。」
身為大師姐的Pinky表示不少朋友的女兒都想參與，但由於年紀尚小，故此她不會擔任提名人。談到近日o靚模風氣，Pinky說：「睇吓佢哋入行為乜，不過佢哋對我冇影響，所有嘢都係個人問題，我唔會鬧佢哋。講真我都唔知邊個打邊個。」
Pinky後悔冇寫真
Pinky不諱言o靚模出攬枕是過火，不過她又覺得o靚模懂得自我宣傳，Pinky表示：「當年我初入行有人搵我出寫真，仲係水禾田操刀，但我當時怕被定型所以拒絕，家諗番都後悔。」
此外，袁小曼自言谷胸衣着不算很性感，加上有保安及工作人員在場，故絕不擔心被人非禮，她笑稱：「喺澳洲咁打扮好普遍。」袁小曼也表示有未讀完書的朋友想參選，但她認為起碼要完成大學才最適合。
採訪：王崇穎
攝影：彭琮然
