社署署長余志穩下星期退休，官場內外唔少人對佢官至D4，無緣升正D6就要退休抱不平，佢噚日同傳媒茶敍，語帶雙關咁話自己一直有腰痛，唔坐得軟腍腍大班椅，所以近十幾年都要坐舊式木藤椅，就算做到部門首長都冇換新椅。
呢款木藤椅係殖民地時代出品，又直又硬，坐時一定要腰骨挺直，特區新紮官員未必鍾意坐。余志穩話呢款椅近年買少見少，佢搵勻全個政府都係剩番四張，可惜退休後唔可以帶走，希望其他同事唔好視為垃圾就好。
得罪林鄭冇運行
余志穩係社署第16任署長，退休後大頭相會同15位前署長一齊掛喺會議室。社署歷任署長多猛人，包括陳方安生、黃錢其濂、林鄭月娥等，余志穩話如果第日有人睇到佢幅相，會講一句「呢個官就唔係做到好高級，但係做事有心盡責」，佢都心足。
官場盛傳余志穩冇運行，係因為得罪林鄭，有官員透露，兩人應該喺民政局共事時擦出火花。當時余志穩負責檢討種族歧視條例，頂頭上司正係常秘林鄭，據講林鄭對余志穩寫嘅文件好多意見，後來更親自操刀，民政局官員形容林鄭在位時係個局「最黑暗日子」，入完林鄭間房，冇人唔係頭耷耷出番嚟。