噚日中午落到茶餐廳，叫咗個鹹魚排骨蒸飯，準備開餐嘅神聖時刻，八方手機收到個咁嘅短訊：「今天12點34分56秒是一個神奇的時刻，它顯示為12:34:5607/08/09。123456789在我們的有生之年再也不會出現，請把這一神奇的時刻告訴你的朋友，祝願他們一切順利，身體健康，工作愉快！」
然後返到office，八方飽受短訊轟炸，無論MSN、電郵定facebook，都收到同一條訊息。facebook有成幾十個群組為咗呢個時刻而成立，冇乜重要目的，來來去去都係網友搵個機會，互相打個招呼，開心吓咁。
英國愛人註冊結婚
雖則話只係巧妙嘅時間組合，並唔會影響到地球公轉自轉，不過網上湊熱鬧嘅人真係好多，幾乎個個主流討論區都見到有人提起。英國傳媒仲話，有對英國愛人喺呢個時間註冊結婚，成世都唔會忘記咁話。唔知大家點樣度過呢一刻？八方就享用緊一頓歷史性嘅鹹魚排骨飯。