吉隆坡有一間海鮮酒家叫做「海外天」，生意旺到不得了，每日午市做兩個半小時，晚市五點半做到十點半，日日爆滿，外間遊客、本地人湧到嚟，冇花冇假，十幾年前去係咁，呢次再去，又係咁，老闆真係賺到盤滿缽滿。左丁山與老婆，兩個人，比較容易搵位，八點前去到，只見有張兩人枱，我哋即刻坐低，抬頭望吓個訂座表，寫滿晒共三十四個名，有兩位係拿督（Dato）㖭！望吓個魚缸，堆滿筍殼魚，條條夠晒大，兩個人點食一條呀？部長話：「食得，一客最少要三百五十克，每一百克十八溝。」既然嚟到，梗係要食清蒸筍殼，一份六十三元馬幣啫。
食魚之際，後面竟然有人叫，嚟到呢度都碰到熟人！原來係退休賓架L一家人，佢話住在Westin後面嘅Ritz-Carlton，住兩日就去浮羅交怡。賓架L話：「嗱，食完晚餐，介紹你去海外天對面，豐隆銀行後面有正嘢食。一間食肉骨茶，一間食乾炒牛河加蛋。」威士汀、麗嘉、萬豪與DorsettRegency四間酒店，齊在BukitBintang頭段，問過一位當地人，佢話Bukit嘅意思係「山」（hill），Bintang就係Star，星也，唔怪得萬豪酒店鄰有一個StarHillGallery。由威士汀向後行去麗嘉，轉入一條JalanImbi（燕尾路），十五分鐘之內就行到海外天，再行三分鐘轉右到ParkRoyal酒店，對面就係金河廣場，跟TimesSquare亦只係一條大馬路之隔，故此最繁盛嘅吉隆坡地段，就在呢一個大圓圈之內。只可惜吉隆坡路無半里平，行人道忽高忽低，忽然有低陷，忽然有幾級樓梯，忽然畀大樹或路旁泊車阻住，行路十分不便，係傷殘人士與坐輪椅人士嘅惡夢，比較吓，就知道我哋由灣仔大佛口行到中環，係幾咁輕鬆！
次日早上，自酒店出門行到燕尾路「海外天」不遠嘅豐隆銀行（HongLeongBank）後面，見有兩間肉骨茶店，邊間正啲呢？企在路旁觀察，一間大店叫做新峰肉骨茶，有客人由司機駕駛平治到達門口，梗係呢間嘞，於是行入去吃肉骨茶，果然不俗。新峰對面有一間「大樹頭蘇記炒粉」，就係吃乾炒牛河嘅地方，晚上去試，牛肉真係好好，不過其他餸菜就麻麻啫，但居然有旅遊巴士載外國遊客到此吃炒河，可見名聲甚響！