香港大學有個民調機構，名為「港大民意研究計劃」，由社會大事如六四應唔應該平反，到家長議題如幼兒便秘等民間意見，都可以調查一大餐。正所謂人怕出名豬怕肥，可能係因為曝光率高、個名夠響，佢哋耐唔耐就收到投訴，發現有人偽冒。最近仲一連收到四宗投訴，搞到總監鍾庭耀要報警。
八方最近收到一個電話，對方以一秒十個字嘅極速表明自己身份，話要做問卷調查。八方聽唔清楚，要求佢講多次代表乜嘢機構，佢就自稱係港大民意調查。當時八方勝在食飽飯好得閒，於是隨緣樂助幫佢做份問卷，打發一下所餘無幾嘅青春。
偽冒做民調套料
調查員話呢個係關於就業問題嘅問卷，問吓八方做乜職業，收入幾多，今年貴庚，對工作滿唔滿意等等。跟住調查員再問八方有冇轉工嘅打算，又有冇興趣做sales，問吓問吓仲問埋八方姓乜。呢個問題即刻令八方好疑惑，八方做咁多次問卷，都未聽過要表露身份嘅。
於是八方發揮傳媒應有嘅求真精神，再問多次對方代表嘅機構，佢話公司名叫「港大民意調查」。咁八方就追問間公司同港大有乜關係，對方又好老實咁話乜嘢關係都冇，只係間公司名咁樣叫法啫。跟住八方再問佢乜嘢公司委託做呢個調查，佢就話唔講得。
共收到四宗投訴
咁抵死！八方唔多順氣，於是打電話上港大民意研究計劃查詢，職員李先生話，連埋八方在內，港大已經收到四宗投訴，話有人偽冒港大民調。由於事態嚴重，港大已經報警備案，佢仲叫八方如有任何損失，都應該報警。八方見警方最近咁唔得閒，又要緝毒，又要爭取加薪，都係唔騷擾佢哋嘞。
講番鍾庭耀壇嘢，過往都被人冒充過，有人試過喺選舉當日假扮港大民調職員，向選民套料。鍾庭耀應該開心先係，名氣大、受歡迎先有人偽冒，又唔見有人冒認左派民調機構「香港研究協會」做問卷！
mailto:[email protected]