吉隆坡雙子塔、會議中心一帶，簡稱KLCC，旺到不得了，高樓大廈林立，豪宅滿佈，都唔知去邊度搵咁多買家、用家，可能係炒嘅居多，KLCC二十幾年前係吉隆坡馬場，記得馬場旁邊有一間貴都酒店（Equatorial），呢日由所住酒店Westin步行前往雙子塔，行行吓見到貴都酒店，先至醒起嗰度就係以前嘅馬場。市內有馬場，猶如有一個市肺，空間感大好多，如今馬場不見了，大廈密集，而附近周邊道路唔見增加，加上汽車數量大增，交通自然擠塞不堪。
自雙子塔商場走出嚟，烈日當空，唔想再行路，走過馬路對面，啱啱有一架的士落客，於是幸運地唔使等車。司機係唐人，佢立即話：「去Westin呀，十溝錢（十元馬幣）！好塞車。」吉隆坡唐人多數識講廣東話，唐人司機最識要錢，唔睇咪表，由唐人街「南香」海南雞飯店去金河廣場，一位唐人老司機話要十溝。唔睬佢，搵到一架的士，司機係印度人，唔講價，只睇咪表，去到金河都只係四元一角，畀夠五元，佢已經講幾句thankyou！
呢位司機又要講價，因為確係塞車，的士周圍都唔見，唯有順從！上咗車，果然錢作怪，佢揸住架車左衝右突，搵小路行，冇符吖，度度塞死，時近中午，伊斯蘭教徒趕住去清真寺祈禱，路邊泊滿車阻住道路，呢位司機就多嘢講咯：「咁多車，實塞啦，家買車唔使錢，簽個名銀行就借你十成，有啲仲可以頭兩個月免供㖭。馬場搬走咗，呢度變成黃金地段，起咁多樓，人人揸車，死冇？」問佢馬場去咗邊，司機話：「你唔識o架嘞，今晚禮拜五跑新加坡馬，我哋可睇電視直播落注，不如我到酒店車你去啦！」咁識搵生意？咪住，講吓馬經先。司機口若懸河咯：「我哋可以投注新加坡馬、澳門馬、香港馬、澳洲馬，當然仲有吉隆坡馬。我哋認為香港馬比較最公道，冇乜拉馬，韋達、柏寶，兩個係好好騎師，新加坡、澳門馬開閘就帶嘅馬多數贏，你哋香港馬就刺激，後面衝上都贏得！」咦，原來外地馬迷認為香港賽馬最公正噃，大家點睇？四十五分鐘之後，的士返到Westin，十元車錢（港紙二十二個半）夠晒抵，畀多兩蚊貼士冇所謂。