珠三角改革發展規劃綱要深受重視，唐唐上半年都親自領軍，帶住工商代表團訪問廣州同佛山等9個珠三角城市，顯示特區不容有失。身為阿爺愛將嘅民建聯又點會唔做啲嘢響應？據聞黨內決定仿效唐唐，安排9+2實地探訪計劃，希望5日內行勻9個城市。
訪問團分兩路
據聞十幾人訪問團會一齊出發去廣州，但完成廣州行程後就由主席譚耀宗同副主席劉江華兵分兩路，各自帶住幾位黨員朝泛珠東、西兩面城市出發，最後再喺尾站深圳會合。有黨員話要兩位巨頭分隊背對背咁走，唔係鬧不和，而係因為短短5日足迹難以去齊9個城市，家分開兩隊人，每隊去3、4個城市就時間啱啱好。
即將隨團嘅陳克勤原來早喺03年出任新界青年聯會主席時，已經搶閘搞過對象以年輕人為主嘅泛珠9+2考察團，希望9年內去9個省。今年交流團去咗江西，行程仲安排到鄉村小學義教。農家菜好多時都有大批蒼蠅嬲住嬲住，據聞好多團員見到都冇胃口，難得克勤扮大膽帶頭夾餸入口，先至令團員夠膽起筷唔使餓暈。