政府將於9至10月期間向行會提交職系架構檢討報告書建議，近期各個紀律部隊工會都最後衝刺，輪流舉行集思會，表達訴求。由各個紀律部隊人員組成嘅紀律部隊人員總工會噚日開會，籌備下月2號嘅集思會，主席林國豪同八方講，紀總今年初已經計劃搞呢個集思會，而且只集中討論整體紀律部隊人員嘅工時同薪酬問題，唔會傾個別部隊薪酬福利。
另外，揚言考慮放棄部份醫療輔助專業資格嘅消防處救護員會，早幾日首次接到紀常會邀請，安排喺9至10月期間會面。副主席屈奇安話，家最重要睇法律意見同政府就職系架構檢討嘅取態，如果傾唔掂，救護員會被逼上梁山，放棄專業資格。