國家信息中心發表報告預測，今年神州經濟增長，會達至8%左右，即係胡溫嘅「保八」任務極有可能完成。保增長任務完成在望，即刻引來四方八面聲音，要求阿爺要防泡沫、壓通脹。
首先，有國務院直屬嘅社會科學院多次發表報告，建議改善信貸結構，最新的調查仲推測，有兩萬億元（人民幣．下同）銀行貸款已流入股樓。各方大合唱，立即觸動市場神經，吹水友謂中央收緊銀根，又謂要打壓樓市、股市，連大行分析員都要見記者，話今年央行好可能要調高存款準備金率。
的確，近期中央官員「手口並用」，銀監會7月底喺一周內「三連發」，分別就固定資產、流動貸款同項目融資尋求意見，另外人行副行長蘇寧亦公開表示，貨幣政策要微調，以「市場化」手段，引導信貸適度增長。內房、內銀股即時被打散，到底中央有無條件收緊信貸先？
致力「保八」只敢微調
先講「保八」，呢個目標已升格到關乎民族尊嚴咁上下嘅重要性，乜都係假，面子緊要，中央唔會畀任何風吹草動去破壞「保八」呢個希望工程。股市、樓市泡沫大家有眼睇，中南海亦唔係盲，明知有日會爆，但邊個夠膽喺今年插爆呢個美麗而夢幻嘅波波？一旦引發另一輪金融危機，無人擔當得起。
社科院力證有萬億計嘅錢流入股樓，無非要管理層正視問題，但知易行難，上半年7萬億元新增貸款，當中好大部份係同基建有關，修橋補路可能一兩日搞掂，但大型基建項目要一期一期做，即係話，貸款亦係分批流出到經濟體系。除非當局可以容忍明年世博會場側邊，到處都係爛尾工程同樓盤，否則水係會繼續泵。
從銀行資金回籠水平睇，更加見到管理層似係靠嚇多於一切。數據顯示，即使央行喺7月微調貨幣政策、提高正回購同央票的發行利率、重啟一年期央票發行，並加大發行央票力度等，目的無非令銀行資金成本增加。但睇番7月份公開市場回籠資金係6630億元，都唔夠「冚」放出街嘅8160億元貸款，顯示資金仍係淨投放緊。另外，上半年有高達1.7萬億元新增票據，將喺第三季開始到期，到時又可以釋放更多貸款空間。
講就天下無敵，做就無能為力，蘇寧再三強調用「市場化」而唔係「規模控制」，大家仲未聽得明？
胡孟青