皇家馬德里今個夏天狂燒銀紙，幾乎日日出頭條咁滯，但巴塞隆拿靠一個美斯都搶晒鏡。美斯除咗幫巴塞喺友賽大炒西雅圖海灣者4:0外，賽前仲喺西雅圖嘅地標太空針塔嘅露兩手，擺明話畀皇馬知，佢哋先至係「至高無敵」。
觀景層演球技
巴塞上月尾喺英國打完兩場熱身賽之後，轉個頭就飛去美國踢多3場友賽。禮拜日佢哋對咗有碧咸坐鎮嘅洛杉磯銀河仲贏2:1，禮拜三就對西雅圖海灣者，然後再喺禮拜六對瓜達拉哈拉。巴塞喺對海灣者前一日，隊中王牌阿根廷國腳美斯，就去咗參觀為1962年嘅西雅圖世博會而建嘅太空針塔，而且仲喺樓高520呎、全方位嘅觀景層，用頭同腳表演超卓嘅控球技術，令在場嘅遊客睇到如癡如醉。
之後呢位22歲球員仲上埋樓高605呎嘅塔頂，高舉織上「西雅圖海灣者vs巴塞隆拿」嘅頸巾，而且擺晒靚靚甫士畀記者影相，不知幾咁威風。此情此景，令我求大俠諗起二奶台N年前嗰齣《秦始皇》嘅主題曲，「大地在我腳下……」
領軍數海灣者4:0
講番禮拜三場波，巴塞憑美斯兩球靚波，喺66,848球迷面前大數海灣者4:0，而呢個入場人數仲係西雅圖英式足球賽嘅新高。巴塞教練哥迪奧拿賽後仲寸爆皇馬，話美斯一個人經已勁過皇馬成隊波。佢咁話：「美斯係喺另一個層次。佢肯定喺當今世上最出色嘅足球員，佢唔單止年輕，仲係一個可以主宰球賽嘅球員。」至於海灣者教練舒密特則話：「美斯有能力將唔可能變成有可能。巴塞是支極為優秀的球隊，可以話係精英中嘅精英。」
美中不足嘅係，巴塞嘅墨西哥後衞馬基斯喺賽前一課操練，整親小腿肌肉，好彩唔算好嚴重，只要唞10至14日就可以返球場練習同埋比賽。
