暑假旺季，各大商場一早開始埋身肉搏搶人流、爭人氣，揸住旺角朗豪坊嘅冠君產業信託（2778）噚日開業績記者會，CEO李澄明（圖）把握機會硬sell商場，問大家有冇留意娛樂版，話最近大婆台又再借朗豪坊拍攝處境劇，今次仲有汪阿姐擔大旗，可以幫商場宣傳吓﹗雖則汪阿姐有一班忠實粉絲，但始終年齡層跟比較多年輕人聚集嘅朗豪坊，好似有啲距離喎。李澄明淡淡定咁話，今個月已經請咗最近人氣指數爆燈嘅「攬枕」o靚模嚟商場宣傳，另外會搭多幾位o靚模，唔使怕唔夠叫座力。佢雖然冇開啲o靚模名，但已呼之欲出喇。
之不過，朗豪坊今次唔會有攬枕送，要送梗係送潮物蘋果iPhone3GS，每日一部，為期兩個禮拜左右。究竟攬枕o靚模受歡迎，定係潮物手機好，大家真係拭目以待。