很多歌手的夢想都是在紅館舉行演唱會，入行6年的鄭融都向着這個目標進發。隨着與監製莊冬昕傳緋聞，鄭融的舊戀聞都被熱炒，以往她不曾承認與劉浩龍的一段情，她接受訪問時自認EQ不夠高，不公開戀情是怕處理得不好會影響雙方的事業。
鄭融的精選碟《融．精選》已推出，原來她一直渴望擁有一隻精選碟，因為她認為精選碟是代表一個歌手的歷程，她日前說：「呢隻碟係對自己嘅一個交代，入行6年都儲咗一定數量嘅歌，呢隻碟可以係一個回顧睇吓自己有幾多好歌，之後就要繼續向前行，唱更加多好歌，再做另一隻精選碟。」在圈中6年阿融開始發覺自己對音樂的知識不足夠，所以她希望有機會進修。
阿融於事業上沒有遇上太大挫折，感情上亦不算多姿多采，自從與劉浩龍（師兄）4年情結束後，便與監製莊冬昕傳緋聞。以往阿融不曾承認與師兄的一段情，她表示之前EQ不夠高處理不來，她說：「當時唔公開係好事，公開咗就要好高EQ去應付，我一定搞唔掂。當時大家事業都一齊起步，如果處理得唔好反而一身蟻，咁講就對大家都冇影響。」
勁讚新歡叻
講到新緋聞男友，阿融再次強調與男方亦師亦友，她更不會因為緋聞而避開與莊冬昕合作，她笑說：「佢啲歌係得，我唔會因為呢啲新聞唔叫佢做監製，佢份人好勁，唔會俾呢啲事影響到。」
夠歌闖紅館
對於踏上紅館舉行個人演唱會，阿融坦言去年公司有向她提及，當時她覺得自己未做好準備，她說：「公司上年提過開騷，我嗰一刻係怯嘅，但係做完呢隻精選碟，睇過自己嘅歌list，我嘅信心返咗嚟，我相信自己呢一刻有足夠信心同體力去應付，家就再等公司去安排，我都好期待呢件事。」
採訪：李珮洳 攝影：黃文成
化妝：VinciTsang
髮型：KateShek（HairCulture）
場地提供：TheContinentalClub（GatewayHotel）